地產入行做地產經紀 Q&A (Discuss.com.hk 瀏覽量超過50萬)

  • 4 回覆
  • 27340 閱讀
*

ryan

  • 管理員
  • 新手
  • *****
  • 6
    • 檢視個人資料
地產入行做地產經紀 Q&A (Discuss.com.hk 瀏覽量超過50萬)

原作者小弟ryan :)

原張貼於: http://www.discuss.com.hk/viewthread.php?tid=19562470&extra=page%3D1
---------------------

由於很多問題常常在本頁被問到, 我自己一直也在解答, 現整理了一下供大家參考, 歡迎指正

入行考牌, 兩個方法:

一. 先考牌再入行, 你可以選擇;
1. 自己到書局買考牌書及試題做, 如不想花錢, 可上網做題
2. 自費報代理行 /工聯會的考牌班

二. 未有牌先入行, 先去做見習營業員 (多數大行會咁請)

無牌照請, 做見習營業員, 入職後會安排你去上公司考牌班 (上堂免費, 考試費自費)

見習生即是無牌, 嚴格來講是""不能參與任何樓盤銷售工作""
(即係你向客面前講幾句: 呢個樓盤點點點...都係唔得, 是犯規)

留意, 如果未有牌, 佣金不可以上足數, 但我覺得問題不大, 因為當你剛剛有牌, 但什麼都唔識時, 有客都係要搵同事合作.
新入行有可能要出去企一手撈客, 視乎你條TEAM有無樓花隊, 及你老細點安排

由上堂, 報名考試, 到出成績到申請牌, 都要兩三個月時間, 我會建議不如一早就入去做, 睇下自己o岩唔o岩做呢行, 頂唔頂得順 (好多人都頂唔順) 其實無經驗入行, 有或無牌都無乜分別, 一開頭由0開始, 都係要學, 有牌係好聽o的, 但其實新手乜都唔識, 有客都唔會比你自己一條友處理

我建議初入行去大行, 畢竟一二手都會接觸到, 而且客都比較多, 打電話call既機會又多d, 會有機會接觸度多o的野


問: s牌同e牌係有什麼分別?

答: s牌就係持牌營業員(licenced salesperson), e牌就叫地產代理(estate agent), 除非你自己開舖 /做主管, 否則唔需要e牌, e牌人工亦唔會多o的. 市場上有間大行, 如果SALES是拿E牌, 個title會叫地產代理(estate agent), 如你覺得咁好聽o的, 所以要比多o的錢, 那沒法子.

考試費E牌貴200蚊, 要600大元, 考既範圍多少少, 考試題目都係50條mc, 不過case study個part有20條, 多s牌一倍, 即係前30後20, 同樣要求都係各對60%先合格, 每年牌費比s牌貴1千元.

P.S. 考了e牌試pass了後, 到出牌時可以申請s牌 (當然pass了s想出e就不可以)


問: 有人話自己買本書讀就得然後去考試局考就得,佢話好易

答: 根本就好易, 得50條mc 來來去去個o的問題, 你係書局買書, 有曬o的模擬習作比你做, o的書又會解埋答案比你聽, 呢題點解選a, 有曬解釋, 睇多幾次點都明啦下. 如果自己做到o岩8成, 就肯定合格. 呢個試好低要求. 話好難考唔過既, 可能唔身讀書真係太差, 記唔到野入腦, 睇唔明題目. 其實會唔會合格自己好易考前已經清楚, 你做幾份模擬題睇下自己o岩到幾多就心有數. 有o的人又輕視過頭, 連正正式式一份模擬卷都唔肯花時間心機做一次, 是是旦旦, 去到考場收到卷, 先第一次正式做50題, 係咁撞手神, 咁唔認真, 唔肥至奇. 肥左就上forum話唔知點解自己唔合格, 搞笑


問: 想知道呢一行有咩難處和享受!

答: 返工時間長又無假, 紅日永遠跟我地無關, 很困身斷六親, 無客無數比人摔既痛苦, 好多人頂唔順收皮. 享受? 如果有日條數唔錯,一個月出幾萬蚊人工都叫比好多人搵得多


問: 小弟會考肥左英文, 想知道如果想升至更高職位.應該點樣去增值!

答: 呢行就唔睇學歷, 英文唔識其實沒關係. 如果由一個sales真係升就係升做分行經理. 當然sales仲有細分, 但其實你三級升到高級客戶經理. 除左人工多幾百外, 做既野同sales都係一樣. 你話sales真係上一層, 就係做分行經理.前題當然要本身好數, 如果區經覺得你係做得野. 又有領導才能, 入行3幾年就做分行經理既人也有. 呢行營業部所有人都係由sales做起, 即使個o的董事, 區董全部都係sales出身. 相對來說是不問出身, 亦不注重學歷, 只注重生意!


問: 大行升職係點?底薪加抽佣比例加?細行就加抽佣比例?

答: 基本上大行好, 細行好, 升職係不會加提成比例, 都是固定一樣的, 大部份都是計跳bar, 跑得多d拆得多d. 我唔知你細行係指乜, 如果係細到得幾間既細行, 什至一間鋪個D鋪, 加埋都唔夠幾個人, 你就唔好預會有乜職升, 頂多加幾百蚊人工, 個title可能好聽左叫客戶經理之類. 其實大行都一樣, 入行一開始叫licenced salespesron, 升一級叫senior, 再上account  manager, 再上senior account manager, sales title去到呢到最盡架啦. 升到高級客戶經理人工都係6千幾蚊, 點先會有得升? 就係睇條數, 半年返到幾多十萬就可以升 (視乎不同TITLE), 如果半年後又無乜數又會跌返落去.

如果真係要升職唔做sales就係branch manager (分行經理), 呢個就開始做管理層既野, 帶一條team去跑數,  唔再需要自己帶客睇樓/做update, 開始要做就係摔o的o靚跑數. 幾時先做到呢個位? 有人比佢老細睇得起條數又勁加上又博,  入行兩三年就做到也不奇怪. 要上到呢個位除左要好數外, 亦要有領導才能才可以, 有o的sales好好數但根本唔識lead人, 都唔會做到呢個位, 呢個位亦唔係咁好做, 有人做左分行經理一排後, 轉返做sales算數, 因為帶team可能仲辛苦過自己一條友跑數, 不如自己跑自己數算數


問: 呢一行壓力系埋好大?穩唔穩?情景如何?

答: 壓力都大, 絕對唔穩定, 好境時好搵埋之後個o的, 點知個市幾時差, 一差時真係靜到嘔.


問: 新仔點學野呢? 同老闆要求調去第2間會唔會唔比? 手續繁複嗎?

答: 學野就自己學, 唔識問人, 跟人睇樓, 有客交出來同師兄合作.

調去第二間, 如果自己搵到第二個區既主管收就可以(當然係同公司)
前提係你老細同意放你走, 肯簽內部tran人份forum
佢簽比你, 第二日就可以去新個區返工, 非常簡單.


問: 如果無生意比人炒,咁可唔可以轉另一間行?

答: 無數既期限好難講, 如果你新入行完全無做過, 都會比返3幾個月時間你上手.

如果咁唔好彩, 你上司已對你失去耐性/覺你唔o岩做, 係呢間比人炒左
你去第二區既其他行見工, 轉區轉公司, 呢o的情況大把, 當然可以.

不過無人會成日呢間挨幾個月無數就轉一次, 如果轉得兩三次都仲係無數, 自己都唔做呢行啦.
真係貪佢咁少老底蚊, 返工時間咁長, 無人會為老底而去做. 做呢行係為開單有佣金


問: 聽說有些地產會要新入職人士背樓盤呎數, 如一個屋苑有二十個不同呎數的單位, 就要全記下?

答: 背是一定要背, 係有排背, 如果你個區有幾個主攻既大屋苑, 都真係有排記, 但是必需!

那區既主力屋苑如果個sales自己都唔熟, 乜野單位什麼座向, 尺數幾大呢o的最基本既野都唔識, 你叫業主同o的客點信你. 好多基本野個客睇樓時一定會問, 比如樓底幾高, 個廳幾尺, 個房幾尺, 呢隻積同個成積差少少尺數, 分別係邊. 你如果唔背得滾瓜爛熟, 你覺得有可能爭取到買家的信任嗎?

還有, 最近期成交, 尺價也是要十分清楚, 要是住在那裡的業主比你還清楚, 你好易比人問到一幢都無. 當然, 無可能返工第一日就叫你全部背熟, 這是不可能, 但返工第一件事就是要先搞清楚自己賣那一些東西的基本資料,那是肯定的. 要不你接到客也沒用, 人家三兩個問題就問到你手忙腳亂, 你自己也不用意思啦


問: 佣金點計?

答: 月結累計跳bar, 最開頭拆10%, 大行拆法基本接近, 跳bar最多是30萬打上拆到35%.

例子: 一個月你做了一單2百萬樓既成交, 又兩邊收足, 有4萬蚊佣金.
那就是4萬蚊數, 自己袋5千

但佣金唔係一簽臨約就即時比, 係單位成交後先比, 一般來說你預真係落到自己袋, 起碼由簽臨約後三個月
« 上次編輯: 八月 15, 2017, 02:42 由 ryan »

*

ryan

  • 管理員
  • 新手
  • *****
  • 6
    • 檢視個人資料
Re: 地產入行做地產經紀 Q&A (discuss點擊超過33萬)
« 回覆 #1 於: 九月 30, 2016, 05:38 »
再來常見問題

1) 一開頭無牌有咩要做?

記樓盤資料,行site, 做o的濕碎立雜野 (剪報, 影印, 配下匙, 幫同事拎下野, 送下文件...), 如果有人肯比你跟睇樓就更好, 大行亦有可能要你去企一手, 你挨得到先有機會叫你返來坐鋪 (點玩法個個老細做法不同), 亦可能就做樓花組打地盤. 好多人話唔想企一手, 又話辛苦又怕無面, 但我想講如果你咁都唔想企, 又乜又物就真係唔好做呢行


2) 開頭無牌仔同師兄分可以折幾多佣? 5成? 1成? 定無 (可能俾人食佣?) 咁咪白做!!

呢o的睇你事前點安排,  無一定個行規係幾多, 一定無可能對半拆, 因為你完全係唔識做, 兩個熟手合作都唔一定對半, 你問下佢可以分到幾多, 3/7又有, 2/8又有, 無都有, 你可以問你老細係咁做法, 同埋問搵佢合作同事係點分, 事前無傾清楚, 事後佢一個仙唔分比你亦唔好怪佢係X街食你佣, 佢咁做無錯

我比個例子你, 個時我第一單, 個客係門口撈返來要搵樓最後比我師兄跟簽成了, 由於我個時根本上係完全唔識, 我只係跟埋去睇樓, 睇佢點傾, 點簽單, 最後佢話分返3成比我, 我同佢講唔洗, 我乜都無做過, 你肯比我跟埋去睇曬全程學野當賺左啦.

我覺得乜都唔識, 仲要無牌唔好太怕蝕底, 下下話同事會食左你個佣. 乜都未知, 連簽張睇樓紙都未識寫, 同人講分乜佣金呢? 學識曬o的基本功先, 只係門口/電話收個客就要分幾多幾多, 你咁搵人合作人地先無興趣幫你. 其他同事可能心想: 唔係你接左個客, 個客都係會搵我地架啦

我見好多時呢到有o的完全未做呢行剛考牌考慮入行既人, 成日問: "我剛考左牌, 我驚會唔會有同事食左我個客, 點預防?"

唔好以為有個牌, 一上班自己就可以獨立運作, 又話要跟同事合作, 份佣要分比人唔抵
考到個牌只係令你可以開始係呢行工作, 仲係乜都唔識時, 不要以為自己好叻


3) 咁拉左客俾師兄,佢開左單? 條數會點上lei? 係我度定師兄度ka?

有些行無牌無得上數, 如果無就係上曬佢度, 要分佢私下比返$你, 有D行就無牌都可以上數, 但只係能上部份


4) 係咪好易會俾師兄搶客? 有咩方法阻止lei?

無, 新仔唔會接到walk in (o的客入來問, 唔熟肯定9成9 hang機答唔到), 可能phone in都唔比你接, 只係可以係門口撈display客, 所以唔會比人搶乜客


5) 聽人講話咩 '刀手' , 係咪指老sales? 咁我主要拉客俾佢地定俾帶自己既師兄?

刀手咪即係負責夾客開單那個SALES


6) 幾時先可以自己開單?

你有牌後又已經明白大概點做, o的屋苑資料記得7788, 就自然開始跟下客, 帶下佢地睇樓. 視乎你資質進度啦. 多數新人開頭都是開租先, 做租相對過程易D. 租唔會話要點夾客. 個客要搬睇中就自然要租.


7) 新入行有咩要準備? 例如卡片係咪要自己準備?文件套呀, 文具呀

卡片點自己準備, 無牌無卡片, 有牌後公司自然印比你, 其他立雜野文具自己準備啦, 小問題來姐


8 ) 男仔係咪無女仔咁著數? 因為男多女少...佢地露少少.........d 客都....咪好易俾女仔搶哂d單???

你咁講就錯, o的客好少話會特別buy靚女, 因為搵到客好多都係夫婦, 一對來睇樓, 好少話單獨一個男人買樓, 就算係, 靚唔靚女都唔係重點啊, 你真係要買野, 搵個sales幫你傾價傾得好o的, 平D買到重要, 定係有個靚女同你行下屋苑重要? 仲有好多tops sales 阿叔, 師奶, 肥婆來ja, 咁你話佢地咁掂咪靠把口, 唔通靠賣肉咩


9) 如果睇樓d樓唔近間行, 係搭的士定自己行有交通提供?如搭的士,有無得claim? thx

多數都無得claim, 有時趕時間下下飛的, 如果你話飛的收訂送訂即係有機會埋DEAL都話. 你這樣問令我想起之前新盤個示位係ifc, 個時有客睇即同佢飛的, 次次都成百蚊, 可惜無一單成, 全部自費


10) 點拆佣, 例子?

大行個佣金拆既制度(跳BAR),係10%起. 以每月為一結
例: 40K佣金自己袋5K, 去到100K自己袋18K
300K打上跳到"頂BAR" 拆35%


11) 聽人講壓力好大, 無數時比人摔數摔到隻狗咁, 是否係真?

做跑數行業一般都係咁, 都係無(唔係無乜)尊嚴, 開單是我地唯一(沒有之一, 只有唯一)的存在既價值!
呢行係咁, 只係"講數"做人. 生存得到的要有打不死既拚勁及鬥志, 心理質素, 抗壓能力也要超強


12) 老老實實, 呢行跑數其實情況係點? 好似成日請人, 是否好難做?

呢行入行要求咁低, 幾乎人人都做得時, 點解又成日請人? 因為真不是很多人做得來. 很多人試過知道是什麼一回事就走了, 這很正常

不是人人也是跑數的料 每人專長不一樣, 不是人人都係可以靠把口搵食. 很多時不做的人, 不外乎這幾個原因:

1.工作時間太長太困身, 無私人時間
2.比上頭摔數爆粗問候老母, 覺得被侮辱, 自己無尊嚴, 受不了
3.原來做中間人有時要做爛頭卒挖爛面在雙方間周旋, 無自尊

其實我覺得做地產已經是比較輕鬆的跑數行業, 咁好資源有曬鋪有曬門口比你接客, 你試下跑保險, 邊可能有間鋪你坐來接walk in/ 門口收客, 那一些要更aggressive才行. 做銀行跑按揭的, 都要天天周圍走, 去地產鋪拍門同經紀打招呼, 叫有乜估價按揭野打比佢來拉生意, 所以做地產有間鋪你坐已經是好幸福


13) 點先做得好?

講真係一句: 堅持! 堅持不一定成功, 但呢行不堅持一定失敗, 因為在工作上難免會遇到太多挫敗, 要退出亦很容易.


14) 做豪宅係唔係最好? 樓價價碼大!

豪宅無錯係可能一單返幾十萬數, 問題是成交唔多, 而且你有機會接到呢o的客? 接到時中間"操作過程" 亦不是新仔可以做得來, 個業主是旦大你一句而家要有票先可以上來睇, 個客睇完還你一百幾十萬, 你已經成個企左係度

去到豪宅/貴價樓,業主同O的客一定不是第一次買樓,經驗比你多百倍,你一個新人根本就無可能做佢地"中間人", 新仔一做做豪宅死既機會太大 (我不是指全部, 有人也可以做得很好) 反而一般私人屋苑, 可能個碼係幾百萬, 做單租皮幾野, 但成交多, 客又多, 街坊生意, 個業主可能第一次賣樓, 個客第一次搵樓, 大家都新, 密食易上手, 打好個底再去其他區發展也不遲


15) 有人話入左呢行搵到過就不易轉行, 點解?

雖然呢行收入不穩定, 亦真係有機會搵到大錢. 例子: 新入行o靚仔打一手, 企ICC撈瓏璽, 有一日撈台客簽左3間, 返左90萬數. 就咁一天佢搵左30幾萬.

呢個"大奇蹟"例子比較極端, 但一般sales在這行曾嘗過甜頭後很難退出. 難聽o的講, 做得呢行多數都唔會係讀書叻既, 去做其他野比你一個月搵唔好話好多, 如4, 5萬, 做其他工做不到


16) 紅日無假放咪好慘? 返工返幾點?

做呢行係咁架啦, 如做大行, 所有紅日一定唔關我地事! 唔好預有假放. 100%無! 返工時間大行多數兩班. 返早一兩個人負責開舖, 9:30-20:00, 大部份人返晚 11:00-21:30

返工為單DEAL可以搞到三更半夜. 我試過有單野扯到深夜3點, 返到屋企5點, 第二早9點半返工作要執手尾. 所以有時, 呢行搵到錢, 但其實都係辛苦錢. 唔係外行人認為, 你地咁輕鬆行下睇下樓打下電話就要收我1%做佣金


17) 網上放盤自己搵客搵樓咪得, 洗乜經紀?

其實可以咁解釋啦, 你二手盤業主放盤, 你話自己搞, 登報紙, 上網有平台, 但老實講, 加陣個個業主都會將自己放盤會放上網? 人人都上網睇?仲有, 你將你既要求同經紀講, 佢會落力幫你搵, 好過自己大海撈針, 另外, 你同業主direct deal時, 三兩句個價唔o岩肯定有一方收皮唔再傾, 經紀做中間人可以用技術 / 技巧 /要不扯爛面做到盡去幫大家deal到

而好多時大家都無當經紀係人, 講到錢有乜情講, 當中加插老細見你傾極都未得又再x你, 真係.......... 好多時簽唔簽到其實真係睇經紀功力, 有時簽到了, 就是大家/或有一方肯妥協讓步. 能否去到這步大家達成共式, 真係好睇經紀傾野水平 (唔會單單都咁順利, 個客一比就比到價, 一還價業主就肯減, 咁順利吧)

老實講, 業主賣給什麼人, 他不關心, 一個o岩價盤, 各行家都有客, 給的價也不會差太遠, 為什麼要簽給你? 另一方如買家, 搵那個經紀都係要比1%佣, 唔通貪個經紀靚仔靚女? 其實我想說的都是, 那就是看經紀水平跟功力, 一單交易經紀中間做的功夫, 業主跟買家永遠不會, 亦不需懂. 在簽約時不時聽到: "我係俾經紀打動, 所以才來."

開間鋪要交租金又要其他開支, 呢o的投放曬係到就係用來搵客幫業主賣出個單位, 唔好單純認為個經紀只係打下電話同個客來, 就要比1%佢唔抵..

仲有一樣野, 同先都係講二手點解仲要經紀唔自己網上自讓, 咁不如問點解一手發展商, 都是大集團, 上市公司, 財力物力都咁強大, 仲要委託地產代理幫佢地推新盤, 佢地完全可以自己賣架, 洗乜仲要派佣比地產代理賺? 大發展商都咁比佣時, 就證明左經紀係有價值, 值得花這些錢請他們來做

地產代理既人際網路, 同業主同客既關係, 都係佢值唔值錢既地方


18 ) 見工有乜要留意?

如果見工講你係想來"學野", 你已經死左9成
呢行係無野學, 呢行係"搵大錢"!!!

不過講真, 有無人教你野其實視乎你跟個老細係點, 無話邊度會"岩新人學野"
因為每間行每條TEAM都係為左搵錢而存在, 而不是"新手訓練場"
簡單來講你要有超強鬥志同決心入去係為左搵大錢

呢行其實唔會點炒人, 大部份都係自己灰爆自己就收皮唔做
時刻保持投入及積極性同過硬既心理質素更加是一定的


另外我補充多句: 我見好多新人(特別是後生的. 90後?)入行了, 返無幾日工就發覺原來做地產要係咁cold call打電話狂比人reject, 可能覺得好無聊又煩啦... (我不知佢地本身心目中以為呢行係點啦?) 結果好快就9 hea, 老細一不在係度拿部電話打機 (而事時代先進, 電話都是遊戲機了)

當然其他同事見到咁仲開心, 即係少個人爭. 有d人返工無奈就係到同老細要求多多又乜又物, 如: 可否返早啊 (理由是不慣收咁夜), 唔知無啦啦邊日又有事要放假啊. 仲有好多野乜乜物物啊, 我想講你對公司未有任何貢獻時, 又唔肯付出, 是一定做不好呢行. 我建議真係唔好曬時間.

呢篇野我不提技巧, 畢竟自己水平有限, 無謂寫這些比師兄看到鬧笑話, 不過最尾講多少少自己看法. 買樓唔係入鋪頭買衫買鞋, o的貨唔係你之餘亦不是明價實價, 唔好以為個客同你睇完就會自己有決定, 然後同你講"我要呢間, 比呢間我", 超旺市係會有, 不過唔係而家, 如果係咁簡單就唔洗經紀存在/人人做地產. 為左扯成一單野, 真係好多時血都嘔出來. 大家入行了就會慢慢體驗到呢行的苦與樂


最後說個笑話: 早起的是做地產的和收破爛的; 晚睡的是做地產的和按摩院的; 不能按時吃飯的是做地產的和要飯的; 擔驚受怕的是做地產的和犯案的; 加班不補休的是做地產的和擺地攤的; 寫字不能錯的是做地產的和編審的; 加入了就很難退出的是做地產的和黑社會的~ 什麼活啊這是~~~

*

ryan

  • 管理員
  • 新手
  • *****
  • 6
    • 檢視個人資料
Re: 地產入行做地產經紀 Q&A (discuss點擊超過33萬)
« 回覆 #2 於: 九月 30, 2016, 05:39 »
2014年12月更新
<更正地產誤區,做呢行不是搵快錢>

新盤超長樓花+爆飛睇運抽籤+客例牌問回佣=新樓難做

提示:做樓花出糧原來係2年後,邊個仲敢話做地產搵快錢,絕對是超慢錢

如近期D盤都成兩年花貨,客未必用即供
如THE PARKSIDE呢個盤入夥2016年11月,即兩年後
第一輪一定爆飛,抽得前既機會好低

個客要好好彩抽得好前先"可能"買到
而家新樓個個客跟AGENT睇樓前, 都國際慣例先問回幾多佣

因為要回佣(呢到講既新樓"回佣"是合法的)比個客
回完比個客,可能自己出佣都係萬鬆D蚊到

但呢筆佣係我幾時收到?
其實發展商找佣金多數會分兩次,第一次係個客比左部份樓價後,出一部份(如1%)佣金比公司
尾數佣金就要等個買家找曬數後,佢地才出

當我地要回佣比個客,所以發展商找既第一批佣金,公司會先扣起不會比經紀
等到個客比曬錢發展商,發展商出曬全部佣金比公司,公司再減返回贈佣金條數比買家,先出糧比經紀

咁呢個盤係長樓花,應該要到入伙後幾個月即2017年4-5月先出糧
而家簽左兩年半後先出糧
我同個客講你估新盤我地經紀好鍾意做?出糧2年幾後
佢聽完唔信,當我吹水

-------

想瞭解下呢行睇下港台呢個劇, 好寫實

獅子山下2014:做地產(上)
https://www.youtube.com/watch?v=67aSqItUsxo

獅子山下2014:做地產(下)
https://www.youtube.com/watch?v=eq6tt59hpdM

【在這個寸金尺土的瘋狂都市,該往哪裡安放自己的良心?】「你做咩㗎?」「做地產。」
「咁你食飯定食屎㗎?」「...」「呢度個個做地產都係為食飯,點解係你做地產做到食­咗屎咁嘅樣?你食屎唔緊要,唔好累到大家陪你一齊食屎吖唔該...」這是李永健(岑珈­其飾演)每星期都聽到阿頭標哥(梁祖堯飾演)向營業額不足的新同事狂吠的基本對白。

剛滿20歲的李永健,加入地產行業三個月;中五畢業後讀了三年毅進課程,做過了售貨員­、搬運工、跟車派報紙、便利店、速遞 ...  卻完全無法找到一份全職,令母親(魯芬飾演)終日憂心,永健終屈服,跟做地產的大哥李­永康(李燦森飾演)入行,開展地產經紀的生涯,也是李永健目前,打得 最長的一份工。

在李永健眼中,這家「誠實地產」裡有如怪獸公司;老闆是躁狂病患的標哥。德仔(施樂飾­演)是公司按摩團團長,專帶隊上深圳「揼邪骨」,卻對結識女孩束手無 策,經常向李永健求教如何與咖啡妹(莫穎彤飾演)搭訕。阿東(吳浩康飾演)是公司的「­鬼手」,騙客人出高價買盤,還常設陷阱想讓李永健工作出錯。 Tiffany(陳逸寧飾演)是一個靠美色上位、滿身名牌的典型拜金女子,能靠幾分姿­色,討好阿頭和一班內地客。「阿妹」(Cecilia  Choy飾演)與Tiffany完全相反,是個連恤衫也不會熨好、終日披頭散髮的內向­宅女,剛加入公司一個月,一單生意也沒傾成,「阿妹」多番被阿東及 Tiffany愚弄,李永健看不過眼,一直處處暗中幫忙。李永健的親哥哥 ﹣康少,是這間公司業積最高的經紀,話頭醒尾的Top  Sales,「誠實地產」內標哥不管任何決策安排,都會詢問康少意見。康少為免同事覺­得偏私,對李永健要求特別嚴格。

永健為人老實單純,在名為「誠實地產」的地產社工作,卻總是被逼使做著不誠實的事。李­永健的真正夢想,是做一個甜品師傅,開一家屬於自己的甜品店。
« 上次編輯: 八月 15, 2017, 02:11 由 ryan »

*

ryan

  • 管理員
  • 新手
  • *****
  • 6
    • 檢視個人資料
Re: 地產入行做地產經紀 Q&A (discuss點擊超過33萬)
« 回覆 #3 於: 八月 15, 2017, 02:18 »
關於未有牌做見習人工點計好多人問, 係到答

無牌做見習 /或剛有牌無任何經常新入行既, 人工大概$5000-5500左右
(有牌既會視乎你TITLE, 每升一級加幾百蚊, 一般大行senior title 既sales, 老底都是6000尾左右)

有最低工資後, 5500蚊除25日除9.5小時=23蚊一個鐘, 時薪不夠法定水平
為什麼是9.5小時, 返工一般早11到晚9半, 應該是10.5小時, 但有一個鐘食飯唔計你返工

大行就咁處理:

有牌既, 你當月如果無佣金出到你戶口(不是指開左單返左數, 係指出糧去你戶口), 咁就只係得老底5500, 公司會貼夠最低工資既人工比你, 我當係6800蚊, 即係出多左1300蚊比你

唔好開心住, 人工係無多左, 呢1300蚊是用"預繳佣金"形式比你, 你下個月有佣出, 公司要扣返, 即係老底都係5500

亦因為佢唔會出到6800蚊請個無牌 (其實都正常, 養一個無牌既要兩個月比佢考牌, 又要教佢等佢上手, 呢D都唔緊要, 更多人係返一陣就一句唔做就走人, 好浪費資源)

所以係最低工資後, 無牌返工時間係大為減少, 大概係返早9半晚5 (7.5小時)
咁就會係出5500蚊人工既情況下, 不會少過最低工資

視乎不同區不同安排, 可能有D區請人時同個無牌來見工既人講:
"你唔係預一日返7.5小時就算啊, 5點收工, 夜晚多客, 你收晏少少留多陣啦..."

佢口頭建議你"加時", 無錯的確係返工時間長左, 但我個人認為來攸呢份工唔係預搵老底, 所以就算叫你自己加時, 得賺左係自己
« 上次編輯: 八月 15, 2017, 02:46 由 ryan »

*

ryan

  • 管理員
  • 新手
  • *****
  • 6
    • 檢視個人資料
Re: 地產入行做地產經紀 Q&A (discuss點擊超過33萬)
« 回覆 #4 於: 八月 15, 2017, 02:40 »
帖子在DISCUSS瀏覽量:

2012-6-20 1
2013-4-30 快破4萬
2013-8-08 59,959
2013-12-17 過8萬
2014-5-12 10萬
2015-7-10 200,850
2016-6-16 295,251
2017-3-08 408,633
2017-8-15 507,780